- बिहीबार, २० चैत, २०८१
काठमाण्डू, १४ फागुन – नेपाली महिला फुटबल टोली फोर नेसन्स इन्टरनेसनल वुमन्स फुटबल च्याम्पियनसिपको फाइनलमा म्यानमारसँग पराजित भएको छ ।
फाइनलमा पुगेर उपाधिविहीन हुनुपरेको १५ वर्षमा यो १३औं पटक हो । बुधबार त्रिपुरेश्वरस्थित दशरथ रंगशालामा घरेलु टोली नेपाललाई २-० ले पराजित गर्दै म्यानमारले उपाधि उचाल्यो । पहिलो हाफ गोलरहित बराबरीमा सकिए पनि दोस्रो हाफमा म्यानमारले नेपालको पोष्टमा दुई गोल गर्यो ।
यी दुई टिमले यसअघि समूह चरणको खेलमा २–२ बराबरी खेले । नेपालले किर्गिस्तान र लेबनानलाई समान १–० ले हराएको थियो । म्यानमार लेबनानलाई ३–१ र किर्गिस्तानलाई ५–० ले हराउँदै फाइनल प्रवेश गरेको हो ।
खेलको ६२औँ मिनेटमा यू फर खिनले गोल गर्दै म्यानमारलाई अग्रता दिलाइन् । त्यसको दुई मिनेटपछि नै म्यानमारले अग्रता दोब्बर बनायो ।
६४औँ मिनेटमा म्यानमारकी विन थेइंगी तुङले टिमका लागि दोश्रो गोल गर्दै अग्रता दोब्बर बनाइन् । पहिलो हाफमा दुवै टिमले गोलका लागि पाएको मौका सदुपयोग गर्न सकेनन् ।
