इजरायली आक्रमणमा मारिए हमासका वरिष्ठ नेता

काठमाण्डु टुडे २०८१ चैत ९ गते १५:३५ मा प्रकाशित

 एजेन्सी– इजरायलले गाजामा गरेको हवाई आक्रमणमा हमासका राजनीतिक नेता सलाह अल–बर्दवील मारिएका छन् । बर्दवील गाजाको दक्षिणी सहर खान युनिसमा इजरायली रक्षा बल (आईडीएफ) ले गरेको आक्रमणमा मारिएका हमासका एक अधिकारीलाई उद्धृत गर्दै अन्तराष्ट्रिय समाचार संस्था बीबीसीले आफ्नो समाचारमा उल्लेख गरेको छ ।

स्थानीयका अनुसार आक्रमणमा बर्दवील र उनकी श्रीमती दुवैको मृत्यु भएको हो । यसबारे इजरायली अधिकारीहरूले भने कुनै टिप्पणी गरेका छैनन् । इजरायली सेनाले गत मंगलवारदेखि गाजामा पुनः हमला सुरू गरेको छ ।

यसअघि दुई पक्षबीच भएको युद्धविराम १९ जनवरीदेखि लागू भएको थियो । तर उक्त सम्झौताप्रति हमास प्रतिबद्ध नभएको आरोप लगाउँदै इजरायलले पुनस् आक्रमण सुरू गरेको हो ।

हमासले इजरायली आरोप अस्वीकार गर्दे कतार, इजिप्ट तथा अमेरिकाको मध्यस्थतामा भएको युद्धविरामा उल्लंघन गरेको आरोप लगाएको छ । हमासद्वारा सञ्चालित स्वास्थ्य मन्त्रालयका अनुसार गाजामा आईडीएफले गरेको आक्रमणमा पछिल्लो २४ घण्टामा ३२ जनाको ज्यान गएको छ ।

Copyright © 2016 kathmandutoday.com Department of Information Reg No:460/074/75 About Us