- बिहीबार, २० चैत, २०८१
काठमाण्डू, २० चैत– भाटभटेनी सुपरमार्केटका अध्यक्ष तथा व्यवसायी मीनबहादुर गुरुङले भाटभटेनीमा लुटपाट र ढुङ्गा हानेर नेपालमा राजतन्त्र नफर्कने बताएका छन ।
आज (बुधबार) भाटभटेनीले चैत १५ को घटनामा कम्पनीको सुरक्षामा योगदान दिएका कर्मचारीहरूलाई सम्मान गर्ने कार्यक्रमपछि बोल्दै व्यवसायी गुरुङ्ले यस्तो बताएका हुन ।
उनले राजसंस्था फर्काउने आन्दोलनका जनकमान्डर बनाइएका दुर्गा प्रसाईँलाई गुन्डा नाइकेको संज्ञा समेत दिएका छन । उनले गरेको आन्दोलनले भाटभटेनीमा लुटपाट र ढुङ्गा हानेर राजसंस्था फर्काउन सम्भव नभएको समेत उनले बताएका छन । राज्यले उनलाई पुलपुल्याउँदा अहिले वितण्डा निम्तिएको उनको भनाइ छ ।
उनले भने, ‘हामीले बर्सेनि ट्याक्स तिर्छौँ सरकारलाई । हाम्रो ट्याक्सबाट सरकारले सुरक्षामा खर्च गर्छ । तर, हामीलाई सुरक्षा खोइ रु हाम्रा दशौँ हजार भाइ बहिनीको सुरक्षा खोइ ? दुलप्रसाद पराजुलीले मात्रै गरेर सुरक्षा हुन्छ ?’ व्यवसायी गुरुङले राज्यले एउटा डनलाई पुल्पल्याएर राखेको हुँदा यो परिणाम आएको पनि बताएका छन ।
उनको क्रियाकलापले राजसंस्था नआउने गुरुङले दाबी समेत गरेका छन । उनले भने, ‘मारवाडीले यस्तो गर्यो, त्यस्तो गर्यो भन्दै हिँड्छ । मारवाडी देशको नागरिक होइन रु मारवाडी भगाउन सम्भव छ ? देश कङ्गाल बनाउने ? दुर्गा प्रसाईँ गुन्डा नाइके हो । राज्यले पुलपुल्याउँदा आज यो परिणाम देखियो ।
उनले भने, ‘उसको क्रियाले राजसंस्था फर्किँदैन, म ठोकुवा दिएर भन्छु । भाटभटेनीलाई लुटपाट गरेर राजसंस्था फर्किन्छ ? भाटभटेनीमा ढुङ्गा हानेर नेपालको संविधान मेटिन्छ ? हामी बुझ्दैनौँ ?
यो सबै डकैत हो ।’राजावादी प्रदर्शनकारीले तीनकुनेमा एक जलाएका थिए भने कयौँ घरमा ढुङ्गा प्रहार गरेर क्षति पुर्याएका थिए । चैत १५ गते राजावादीको हिंसात्मक प्रदर्शनका कमान्डर प्रसाईंको नेतृत्वमा राजधानीको तीनकुने र कोटेश्वर क्षेत्रमा विध्वंश मच्चिएको थियो ।
