- बिहीबार, २० चैत, २०८१
काठमाण्डू, २० चैत– पूर्व प्रधानमन्त्री एवं नेकपा माओवादी केन्द्रका अध्यक्ष पुष्पकमल दाहाल प्रचण्डले महिलाले बन्दुक उठाएकैले नेपालबाट राजतन्त्रको अन्त्य भएर गणतन्त्र स्थापना भएको बताएका छन । आज (बुधबार) अखिल नेपाल महिला संघ क्रान्तिकारीको लुम्बिनी प्रदेशको दोस्रो सम्मेलन उद्घाटन गर्दै माओवादी अध्यक्ष प्रचण्डले यस्तो बताएका हुन ।
अध्यक्ष नेपाली महिलाले वीरताको उच्च गाथा कोरेको पनि बताएका छन । प्रचण्डले भने, ‘माओवादीको जनमुक्ति सेनामा ४०–४५ प्रतिशतसम्म महिला थिए । जहाँ महिलाले कमान्ड गरेको कुनै पनि मोर्चा हामीले हारेनौं । यो सबैका निम्ति उत्साहको गर्वको कुरा हो, ‘हामीले युद्धमा सहजै जित हासिल गरेका थिएनौं, त्यसको पछाडि लडाईंको मोर्चामा जाने महिलाले जगाएको उत्साह थियो, वीरता थियो ।
त्यही वीरताले यो देशबाट राजतन्त्रको अन्त्य गरेर गणतन्त्रको स्थापना गरेको हो । देशमा ३३ प्रतिशत महिला सहभागिता सुनिश्चित गर्दै समावेशी समानुपातिक प्रतिनिधित्व सुनिश्चित भएको हो । राज्यबाट वर्षौंसम्म हेपिएका र दबाइएका महिलाले हातमा बन्दुक बोकेपछि नेपाली इतिहास बदलिएको उनको भनाइ छ । ‘नेपालका श्रमजीवी महिलालाई राज्यले सधैं हेप्यो, दबायो ।
ती हेपिएका, दबाइएका महिला जब बन्दुक हातमा लिएर अगाडि बढे उनीहरूले इतिहास बदल्न सक्ने रहेछन्, राजा–महाराजालाई खेद्न सक्ने रहेछन भन्ने पुष्टि भयो ।’ उनले भने ।जनयुद्धको बेलामा महिलाको सहभागिता बढाउन सकिएन भने क्रान्ति सफल हुन सक्दैन भन्ने विश्वइतिहास, मार्क्सवाद, लेनिनवाद र माओवादले सिकाएको कुरा तत्कालीन नेकपा माओवादीले लागू गरेको प्रचण्डले बताएका छन ।
जनयुद्धमा नेपाली महिलाको योगदान विश्वक्रान्तिकै लागि उदाहरण बनेको भन्दै उनले थपे, ‘जनयुद्ध अगाडि बढ्दै जाँदा महिलाले वीरताका उच्च गाथा कोरे । नेपाल विश्वक्रान्तिको इतिहासमा उदाहरण बन्यो । नेपालका दलित महिलाले अब प्रहरी चौकी कब्जा गरेर पार्टीलाई हतियार बुझाउने काम गरे, त्यसले समग्र क्रान्तिमा ऊर्जा भर्ने काम भयो ।’
