- मंगलबार, ९ वैशाख, २०८२
काठमाण्डू, २६ चैत– नेकपा एमालेका अध्यक्ष समेत रहेका प्रधानमन्त्री केपी शर्मा ओलीले नेपालमा रेल चलाउने कुरा गर्दा विरोध गर्नेहरूलाई सित्तैमा रेल चढाइदिने भनेको तर कोही पनि सम्पर्कमा नआएको बताएका छन ।
आज (मंगलबार) मधेश प्रदेश सभालाई सम्बोधन गर्दै प्रधानमन्त्री ओलीले यस्तो बताएका हुन । प्रधानमन्त्री ओलीले आफूले नेपालमा रेल चलाउने कुरा गर्दा मजाकको विषय बनाइएको स्मरण उनले गरे । प्रदेश सभालाई सम्बोधन गर्दै प्रधानमन्त्री ओलीले भने, ‘मैले रेलको कुरा गर्दा मानिसहरूले मजाक उडाएका थिए ।
तर जनकपुर आएर मैले आफैंले टिकट काटेर रेल चढेँ । मैले साथीहरूलाई भनेको थिएँ, जोजोले विरोध गर्नुहुन्छ, जनकपुरमा फ्रिमा एकपल्ट कुदाइदिउँला भनेको कोही पनि आएन फ्रिमा कुद्न ।’ प्रधानमन्त्री ओलीले विगतमा जनकपुर–जयनगर रेल चलेर लामो समयसम्म बन्द भएको तर अघिल्लोपटक आफूले सरकारको नेतृत्व गर्दा पुनः चलाउन सुरु गरेको उनले बताए ।
यसबाट जनतालाई सुविधा पुगेको पनि बताएका छन । उनले भने, ‘रेल निर्माण गर्न लगाएर, रेल किनेर फेरि सञ्चालन गर्न थाल्यौं । त्यसले जनतालाई छिटो, सस्तो सुविधा पुगेको छ ।’
सुरुसुरुमा नयाँ कुरा गर्दा कसैले नपत्याउनु स्वाभाविक भएको उनले बताए । आत्मविश्वास नभएको व्यक्तिले कुरा काट्ने गरेको बताउँदै उनले भने, ‘सुरुसुरुमा त्यस्तै हो, मान्छेले कुरा काट्छ, विश्वास गर्दैन, पत्याउँदैन । हुँदैन, सकिँदैन भन्छ । आत्मविश्वास छैन भने सकिँदैन ।’
