- शुक्रबार, १२ वैशाख, २०८२
काठमाण्डू, ११ वैशाख– भुटानी शरणार्थीसम्बन्धी एक चर्चित मुद्दामा संलग्न चार जना शरणार्थीलाई हालसम्म राखिएको प्रहरी हिरासतबाट स्थानान्तरण गर्न सर्वोच्च अदालतले आदेश दिएको छ ।
अदालतले बिहीबार उनीहरूलाई झापास्थित बेलडाँगी शरणार्थी शिविर वा अन्य सुरक्षित र उपयुक्त स्थानमा राखेर अनुसन्धान अगाडि बढाउन निर्देशन दिएको हो ।
न्यायाधीश बालकृष्ण ढकाल र नित्यानन्द पाण्डेयको संयुक्त इजलासले दिएको आदेशमा प्रहरीले हालसम्म झापाको काँकडभिट्टास्थित इलाका प्रहरी कार्यालयमा राखी अनुसन्धान गर्दै आएका आशिष सुवेदी, रोशन तामाङ, सन्तोष दर्जी र अशोक गुरूङलाई अब २४ घण्टाभित्र स्थानान्तरण गर्न भनिएको छ ।
यी चारै जनालाई अध्यागमन विभागको अनुरोधमा प्रहरीले नियन्त्रणमा लिएको थियो । तर, अदालतले प्रहरीले प्रयोग गर्दै आएको स्थान अनुसन्धानका लागि मानवोचित र कानुनी हिसाबले उपयुक्त नठानी उनीहरूलाई पूर्ववर्ती शरणार्थी शिविर वा त्यस्तै स्तरको स्थानमा राख्नुपर्ने ठहर गरेको हो।
अदालतको आदेशमा अनुसन्धान प्रक्रिया यथासक्य शीघ्र र निष्पक्ष रूपमा सम्पन्न गर्न भनिएको छ । अनुसन्धान ६० दिनभित्र सम्पन्न गर्नुपर्ने भन्दै सम्बन्धित निकायलाई समयसीमा तोकिएको छ ।
आशिष, रोशन र सन्तोषलाई गत चैत १६ गते बेलडाँगी क्षेत्र र अशोकलाई चैत १९ गते काँकडभिट्टाबाट पक्राउ गरिएको थियो । उनीहरूलाई पक्राउ गरेपछि अध्यागमन विभागमार्फत अनुसन्धान अघि बढाइएको थियो ।
पक्राउविरुद्ध आशिषका बुबाले सर्वोच्च अदालतमा बन्दीप्रत्यक्षीकरणको निवेदन दायर गरेका थिए ।
