- सोमबार, १५ वैशाख, २०८२
काठमाण्डू, १५ वैशाख– पूर्व प्रधानमन्त्री एवं नेपाल समाजवादी पार्टी (नयाँ शक्ति) का अध्यक्ष डा. बाबुराम भट्टराईले नेपालमा देखिएको नागरिक असन्तुष्टि प्रधानमन्त्री केपी शर्मा ओली नेतृत्वको सरकारप्रति रहेको दाबी गरेका छन ।
भारत भ्रमणमा रहेका भट्टराईले सोमबार द हिन्दूसँगको अन्तर्वार्तामा नेपाली नागरिकको असन्तुष्टि लोकतन्त्रप्रति नभएर ओली नेतृत्वको सरकार प्रति रहेको बताएका हुन ।
अन्तर्वार्तामा भट्टराईले नेपालमा लोकतान्त्रिक प्रक्रिया कमजोर हुने कुनै सम्भावना नरहेको पनि बताएका छन । उनले भनेका छन्, ‘नेपालमा राजतन्त्र फर्किने कुनै सम्भावना छैन र नागरिक असन्तोष ओली सरकारप्रति हो, लोकतन्त्रप्रति होइन ।’ ‘नेपाल अहिले शेरबहादुर देउवा, केपी शर्मा ओली र प्रचण्ड भन्ने तीन नेताको चक्रमा फसेको छ।
आर्थिक विकास निकै सुस्त भएको कारण युवाहरु निराश छन्। जनताले परिवर्तन खोजिरहेका छन्, त्यसैले हामी नयाँ मोर्चा गठन गर्दैछौं,’ भट्टराईको भनाइ उद्धृत गर्दै द हिन्दूले लेखेको छ । पूर्वप्रधानमन्त्री समेत रहेका भट्टराईले बढ्दो असन्तुष्टि सम्बोधन गर्न नयाँ राजनीतिक मोर्चा ल्याउने तयारी भइरहेको बताएका छन् ।
उनले नयाँ मोर्चाको प्रारम्भिक नाम ‘प्रगतिशील लोकतान्त्रिक मोर्चा’ वा ‘प्रगतिशील समाजवादी मोर्चा’ राखिएको जानकारी पनि दिए। ०८४ सालमा हुने आगामी निर्वाचनलाई लक्षित गर्दै विभिन्न नयाँ समूहहरू यो मोर्चामा सहभागी हुने भट्टराईले बताएका छन । भट्टराईले काठमाण्डूमा हालै भएको राजतन्त्र पक्षधर प्रदर्शनले पर्याप्त राजनीतिक समर्थन नपाएको पनि बताए। ‘जनता ओली र देउवा सरकारप्रति असन्तुष्ट छन्, लोकतान्त्रिक प्रणालीप्रति होइनन्। त्यसैले नेपालमा राजतन्त्र फर्किने कुनै सम्भावना छैन,’ अन्तर्वार्तामा उनले भनेका छन् ।
भट्टराईले अहिलेको सरकारप्रति बढ्दो असन्तुष्टि हुँदाहुँदै पनि तत्काल सरकार परिवर्तनको सम्भावना न्यून रहेको बताए। ‘संसदमा कुनै दलको बहुमत छैन । अहिले परिवर्तन भए पनि गुणात्मक परिवर्तन नहुने सम्भावना छ, किनभने ओली र देउवा सरकारमा र प्रचण्ड विपक्षमा भएका सबै नेताहरू बदनाम भइसकेका छन्। त्यसैले हामी नयाँ विकल्पको खोजीमा मोर्चा निर्माण गर्दैछौं,’ उनले भने ।
भट्टराईले अन्तर्वार्तामा भनेका छन्, ‘नेपालको अहिलेको राजनीतिक समस्या मुख्यतः माओवादी आन्दोलनले आफ्नो पूर्ण एजेन्डा कार्यान्वयन गर्न नसक्नुको प्रतिफल हो।’ उनले अगाडि थपेका छन्, ‘नेपालमा क्रान्ति अपूर्ण रह्यो र अहिले देखिएको असन्तोष र आन्दोलनहरू त्यो अपूर्णताको पीडा हुन्, जसलाई पार गर्दै नयाँ परिवर्तनको बाटो खोल्नुपर्छ।’
