- आइतबार, ७ वैशाख, २०८२
काठमाण्डू, ३ वैशाख– इलामको सुखानी वन क्षेत्रमा बैजनी रंगको कोइली चरा भेटिएको छ । यसलाई नेपालमा फेला परेको नयाँ प्रजातिको चराको रुपमा अभिलेखमा राखिएको छ । यससँगै नेपालको अभिलेखमा चरा प्रजातिको संख्या ८९९ पुगको छ ।
नेपालका चराविद राजेन्द्र गुरुङले पहिलोपटक चैत १२ गते बिहान ११ः२० बजे सो भाले चरा देखेको नेपाल बर्ड रेकर्ड कमिटीले जानकारी दिएको छ । उनीसँगै रहेका दुई जना मलेसियन नागरिक र नेपाली चराविद अनिस तिम्सिनाले पनि चरा अवलोकन गरेका थिए ।
उनीहरुले करिब २० मिटरको दुरीबाट सो चराको फोटो र भिडियो खिचेर २८ चैतमा थप पुष्ट्याइँका लागि नेपाल बर्ड रेकर्ड कमिटीको कार्यालय काठमाण्डूमा पठाएका थिए ।
प्राप्त विवरणहरुको अध्ययन र राष्ट्रिय–अन्तर्राष्ट्रिय पन्छीविदहरुसँगको रायसुझावका आधारमा सो चरा नेपालका लागि नयाँ प्रजातिको रुपमा पुष्टि भएको नेपाल बर्ड रेकर्ड कमिटीका अध्यक्ष डा. तुलसी सुवेदीले जानकारी दिएका छन । सो चराको अंग्रेजी नाम Voilet Cuckoo र नेपाली नाम ‘बैजनी कोइली’ राखिएको छ ।
नेपाल बर्ड रेकर्ड कमिटीका अनुसार यो चरा भुटान, फिलिपिन्स, सिंगापुर, बंगलादेश, ब्रुनाई, चीन, भारत, इन्डोनेसिया, आलोस, मलेसिया, म्यानमार, थाइल्याण्ड र भियतनाममा आवासीय रुपमा पाइन्छ । यसले भुटान, फिलिपिन्स र सिंगापुरमा प्रजनन गर्छ । विश्वमा यस चराका दुई उपप्रजाति अभिलेख भएका छन् ।
