- आइतबार, ७ वैशाख, २०८२
काठमाण्डू, ४ वैशाख– गत मंगलबार प्रधामन्त्रीको सरकारी निवास बालुवाटारमा वर्तमान सत्ता गठबन्धन दलका दुई शिर्ष नेता कांग्रेस सभापति शेरवाहादुर देउवा र एमाले अध्यक्ष समेत रहेका प्रधानमन्त्री केपी शर्मा ओलीबीच गोप्य भेटवार्ता भयो ।
मंगलबार बिहान १० बजे देखि ११ बजे सम्म प्रधानमन्त्री निवासमा ओली देउवाबीच भएको गोप्य भेटवार्तामा पछिल्लो राजनीतिक अवस्थाबारे छलफल भएको हुन भएको स्रोतले जानकारी दिएको छ । मंगलबारको भेटवार्तामा प्रधानमन्त्री ओलीले कांग्रेस सभापति देउवासँग पछिल्लो समय सरकारमाथि सत्ता घटक कांग्रेसकै नेताहरुबाट भईरहेको चर्काे आलोचनाप्रति गुनासो पोखेका थिए ।
प्रधानमन्त्री ओलीले मंगलबारको भेटमा कांग्रेस सभापति देउवासँग भने, ‘ कांग्रेस एमाले मिलेर सरकार निमार्ण गरेको हो । तर कांग्रेस नेताहरु उल्टै सरकारको आलोचना गरिरहेका छन ? यसरले सरकारलाई कमजोर बनाएको छ ।’
जवाफमा देउवाले सरकारमा रहेका कमजोरीहरू औँल्याउँदै भने, ‘ओलीजी, यसरी अगाडि बढ्न सकिन्नँ। सरकारको विकल्प खोजिएको होइन, तर गल्ती र कमजोरी सच्याएर मात्र अगाडि बढ्न सकिन्छ ।’ बालुवाटार स्रोतका अनुसार, दुई शीर्ष नेताबीच करिब आधा घण्टा मतभेद स्पष्ट पार्ने र मन मिलाउने प्रयास भएको थियो । त्यसपछि भने सरकारलाई ठोस रूपमा अघि बढाउने सहमति भएको बालुवाटर निक उच्च स्रोतले जानकारी दिएको छ ।
पछिल्लो समय कांग्रेसभित्रैबाट सरकारको आलोचना हुँदै आएको छ । कांग्रेस महामन्त्री गगन थापाले त प्रधानमन्त्रीको ‘बेडरुममै बिचौलियाको पहुँच’ रहेको आरोप लगाएका छन् ।
उनले देशको अर्थतन्त्र धराशायी हुनुको मुख्य कारण यही भएको बताएका छन्। यस्तै, नेता शेखर कोइराला र एनपी साउदले पनि दुई ठूला दल मिलेर बनेको सरकारले जनअपेक्षा अनुसार डेलिभरी दिन नसकेको भन्दै आलोचना गरेका छन् ।
यता, प्रमुख प्रतिपक्षी दल माओवादी केन्द्रका अध्यक्ष पुष्पकमल दाहाल ‘प्रचण्ड’ले भने नयाँ वर्षमै नयाँ सरकार बन्ने संकेत दिएका छन्। उनका अभिव्यक्तिसँगै सत्तारूढ गठबन्धनभित्र सत्ता समीकरण पुनः गडबडिन सक्ने अनुमान गरिएको छ।
